Philippians 4
Ani kava'mo hiyo, huno hu'niya gemae
1Nahau nayamopafi'mo nahau'niya konaga'nimogitapae, lapakaefe'mo lusi kava huno ne'nahaiye. Lapakaefe'mo namogaga ne'auvanageno Goti'a lapakaeteti'mo ala nagi'nimo namigiye. Inagi Ala kava nepi'mo lokiya vaitapa he tita maiyo.2Yuvotiga'e Sitakiga'efe'mo lanahao ke nehovanagi, lanakaemo Ala kava nepi'mo mai'netanae'mo magoke lanaipa lanakesamo alitana mai'ao. 3Goti ali'ya'amo nagae'e'mo magokepi lokaeka ne'alina ve'nimogae, Kagaefe'mo kahao ke nehovanagi, ani lole atala'mo nagae'e'mo alagepa faigoko gelefe'mo magokepi lokae'ana ali'ya'mo ali'na'a atala'mo alagepa huka hana mao. Anakaegi Kilemeni'agi muki vaya'mo nagae'e'mo magokepi lokaeta ali'ya'mo ne'aluna vayanagi apaki'apimo Goti'a maige maige hu'a maisaya vaya'ai apaki'apimo avo'mo kae male'niya mukufi'mo avo'mo kae male'niye. 4Ala kava nefe'mo muki afina'mo lapamogaga aiyo. Halate, lapamogaga aiyo, hu'na nehuve. 5Yuna lapaipa kava'mo alitapa apave lige'apao lapakeyo, Ala kava ne'mo ago eminesiya afina'mo alagi hogo nehiyanagi. 6Mago kavafe'mo lapausoli osuta muki kavatefe'mo nunumu hutapa afi neketapae'mo hao ke nehetapa lapau'nisiya yafe'mo Gotife'mo ge huta afi gegeno'ao lapaipamo alino falu huno lapategaiye. Haiya kava huno laipamo alino falu huno nelatefi o'age'nona'monanafa afa'a alino falu huno lapatesiya kava'mo'a Kalaisi Yesupi'mo mai'nayanageno lapaipa lapakesale'mo afa'a yagaino lapategaiye.
8Konaga'nimogitapae, ge'nimo hu'na hano hugefe'mo hu'nae'mo, lapakaemo muki alagepa kava'e ala apaki'apimo ne'apamiya kava'efe'mo lapakesa afifi hutapa maiyo. Lama ge kavanagi ani kavatefe'mo agi'ale'mo ali'a asaga hu'a ne'ataya kavanagi fatago kavanagi o'ani'ya ya'mo ohane'niya kavanagi kanale kavanagi ala agi'amo hane'niya kavanagi hutapa lapakesa afifi hutapa maiyo. 9Nagaemo ali'na lapaya male'nogetapa alita lapaipafi'mo male'naya gemo akame hiyo. Nava gemo afiteta nehuva kava'mo ago nage'nayanagi nakame higeno'ao Goti'a laipamo alino falu nehiya kava'mo aepa vekamo'a lapakae'e'mo magokepi lokaeno maino.
Polo'a fiku ha mae'a ami'naya ya'mo aliteno'ae'mo hapao ke he'niya gemae
10Yatala afina'mo utegetapa halate nagaefe'mo lusi kava hutapa lapakesamo ne'afitapa mago ya'mo fiku naha maeta nami'nage'nae'mo Ala kava nepi'mo lusi kava hu'na namogaga ai'nove. Muki afina'mo nagaefe'mo lapakesamo ne'afiya'monanafa alita nave lisaya ka'mo ohane'niye. 11Mago yafe'mo kafu hu'ne'nae'mo mani gemo nehufiye. Ha'ao, Kalaisi'a alino naya male'nige'na haiya kava hu'na ne'maufige'na vaya'mogi naha maesayafe'mo nagesamo o'afi'na afa'a mai'nove. 12Kafu hu afina'e mago'e ya'mo ne'aluva afina'e'mo afa'a maisuvafe'mo afite'na age'nove. Muki afina'mo u'ne'na hu'na ne'mauvategamo alu kava alu kava'mo afole ne'aige'nae'mo afa'a mai'nove. Alino naya male'nige'nae'mo naga netefi namu nepaefi kafu nehufi alopa ya'mo ali'nofi hu'na afa'a maisuvafe'mo ago afite'na age'nove. 13Nagaemo Kalaisipi'mo mai'ne'nae'mo lokiya vaino ne'nateya himamu'aleti'mo muki kava'amo afa'a huguve. 14Ani gemo nehuva'monanafa kanamo ne'aluva kavatefe'mo alagepa kava hutapa nagae'e'mo afalu afalugana hutapa naha mae'nae. 15Filipai vaya'mogitapamo ago afi'nayana nagaemo hogote afina'mo alagepa faigoko gemo ae'na hakalo hu'na lapa paite'na Masetoniya kotegamo atale'na u'noge'apae'mo muki siosi'ale siosi'ale'mo mai'naya vaya'mogimo namite'a alisayafe'mo nagae'e'mo afalu afalugana hu'a lokae'a ali'ya'mo o'ali'nagetapa lapakaeke'mo nagae'e'mo magokepi lokaeta ali'ya'mo ali'nae. 16Lapatale'na u'na Tesalonaika taonifi'mo mai'nogetapae'mo mago'e ya'mo muki afina'ae afina'ae'mo naha maetapa nami'nae. 17Nagaemo mago ya'mo fiku alisuvafe'mo nagesamo no'afufa lapakaeke'mo akamelegati mago'e ya'mo alisayafeke'mo nagesamo ne'afuve. 18Inagi muki nami'naya ya'mo ali'nogeno mago'e ya'nimo afa'a hane'niye. Epafalonaitasi'a fiku nami'naya ya'mo alinineno nami'nige'na hai'mo ali'nove. Alagepa atumo ne'aiya ofalinimo hane'nigeno Goti'a hau'nigeno amuse huno nelapate. 19Goti'nimo'a Kalaisi Yesuteti'mo asole ya'mo male'niya yapati'mo lapakaemo muki kafu hu'nisaya ya'mo afa alino lapamigiye. 20Afotimo Goti agi'ale'mo muki afina'ae afina'ae'mo alita asaga hulita vigetao. He, lama ge.Ge'nimo alagi hano hu'niya gemae
21Lapakaemo muki vaya'mo Kalaisi Yesupi'mo apaote vaya'aife'mo ge apamamaeyo. Nagae'e'mo lokae'a mai'naya konagatimogi'e'mo ge lapamamae'nae. 22Muki apaote vaya'mogi ge lapamamae'naya'monanafa hogote gamani vekamo ali'ya'amo ne'aliya vaya'mogi'e'mo mago'e hu'a ge lapamamae'nae. 23Ala kava netimo Yesu Kalaisi'a muki'amogitapamo fiku lapa maeno lapamino. He, lama ge.
Copyright information for
KYG